Pontedeume, 12 de decembro de 2025. O Bloque Nacionalista Galego (BNG) presentou hoxe en Pontedeume un conxunto de cinco emendas aos orzamentos xerais da Comunidade Autónoma de Galiza para o ano 2026, que suman máis de 7,5 millóns de euros en investimentos directos para o concello. As iniciativas céntrase en saneamento, infraestruturas viarias, equipamentos culturais e mellora da costa, e foron presentadas polo portavoz municipal do BNG, Aaron Curbeira; o deputado autonómico Xosé Golpe; e a responsable comarcal do BNG, Pilar Lozano.

"Presentamos hoxe un proxecto ambicioso de transformación para Pontedeume e a comarca do Eume. Son cinco iniciativas ben planificadas e con orzamento detallado que responden ás demandas reais da nosa xente", explicou Aaron Curbeira durante a presentación.

EMENDA 1: SANEAMENTO DA RÍA ARES-BETANZOS

A emenda máis importante e con maior dotación económica é a destinada ao saneamento integral da ría Ares-Betanzos, cun investimento de 6 millóns de euros. Esta actuación busca resolver un dos problemas históricos e máis graves de Pontedeume: a falta dunha depuración integral das augas residuais que desembocan na ría.

O saneamento da ría é fundamental para mellorar a calidade ambiental, protexer o ecosistema mariño, manter as condicións para o marisqueo e converterse nun elemento transformador do desenvolvemento turístico de Pontedeume. "A ría de Betanzos é un recurso que temos que coidar. Hoxe é a asignatura pendente máis importante para a Xunta. Non pode haber outro verán con descarga de residuos. Isto ten que cambiar", subliñou Xosé Golpe.

Na mesma emenda tamén se recollen actuacións para garantir e asegurar a zona de traballo que arestora ocupa a confraría de Pontedeume, coma un control de acceso e delimitación da zona de traballos portuarios.
EMENDA 2: PLAN DE MELLORA DO PARQUE NATURAL FRAGAS DO EUME APLICACIÓN DO PRUX

O BNG presenta unha emenda por 1,5 millóns de euros compartida co resto de concellos da comarca (Cabanas, A Capela, As Pontes e Monfero) para a aplicación do Plan de Recuperación de Usos e Ecosistemas (PRUX) no Parque Natural Fragas do Eume. Esta iniciativa vai máis alá da simple execución do PRUX: tamén servirá para establecer sistemas de monitorización continua da calidade das augas do río Eume.
"A semana pasada presenciamos un novo episodio de turbidez no río Eume. Isto non é casual, é síntoma dunha falta de control real sobre a calidade das augas. Esta emenda non só busca mellorar o parque natural, senón tamén dotar de ferramentas para coñecer e controlar a calidade das augas. É protección ambiental real", explicou Pilar Lozano. A monitorización contínua permitirá detectar precozmente calquera problema de contaminación ou degradación da calidade das augas

EMENDA 3: CONSTRUCIÓN DUN AUDITORIO MUNICIPAL PARA PONTEDEUME

O BNG propón a construción dun auditorio para 400 espectadores que funcione como espazo cultural polivalente. Con orzamento non especificado na emenda, pero que se propón dote de fondos suficientes para unha construción de calidade, este equipamento cultural é esencial para unha vila de tamaño e importancia como Pontedeume.
O auditorio permitirá a realización de eventos culturais, artísticos, musicais e sociais de relevancia, converténdose en catalizador de actividade cultural para a vila. "Pontedeume merece ter un espazo digno para a cultura, para a música, para os eventos que reúnen á comunidade. Non é un luxo, é unha necesidade para o desenvolvemento cultural de calidade", sinalou Aaron Curbeira.

EMENDA 4: ESTUDO DA CONEXIÓN N-651 CON AC-144

A cuarta emenda busca a realización dun estudo técnico que analice a viabilidade e as mellores opcións para mellorar a conexión viaria entre a estrada nacional N-651 e a autonómica AC-144 ao seu paso por Pontedeume. Esta conexión é fundamental para facilitar a mobilidade e o acceso á vila desde as principais vías de comunicación autonómicas.
Un estudo técnico riguroso permitirá deseñar unha solución que mellorar a fluidez do tráfico, aumente a seguridade viaria e facilite o acceso de xente e empresas a Pontedeume. "As comunicacións son claves para o futuro económico de calquera concello. Esa conexión entre a N-651 e a AC-144 é un nó crítico que merece investimento real", explicou Xosé Golpe.

EMENDA 5: ESTUDO DE REORGANIZACIÓN DO ESPAZO DO HOTEL EUMESA

A quinta emenda propón a realización dun estudo de reorganización e potenciación do uso do espazo que ocupa o Hotel Eumesa, situado nun lugar estratéxico na costa eumesa. Este espazo ten un enorme potencial para mellorar a infraestrutura turística, portuaria e de servizos de Pontedeume.
Un estudo detallado permitirá definir as mellores opcións para aproveitar este recurso, xa sexa para ampliar a oferta turística, mellorar a accesibilidade ao porto ou crear novos servizos para a vila. "O espazo do Hotel Eumesa é un activo que Pontedeume non pode desperdiciar. Merece un proxecto ambicioso que converta este espazo nun motor de desenvolvemento", sinalou Pilar Lozano.

OUTRAS EMENDAS DE TIPO XERAL
Por outra banda, Curbeira tamén sinalou que nas emendas de tipo xeral, aquelas que se dotan orzamentariamente para actuar en varios concellos. Están recollidas as demandas das Anpas para a mellora do servizo de comedor dos centros educativos de Pontedeume.
Do mesmo xeito, tamén se recollen nestas emendas xerais, a dotación de medios par ao centro de saúde da vila.

COMPROMISO DO BNG

As cinco emendas do BNG a Pontedeume forman parte dunha estratexia máis ampla de investimento na comarca do Eume, que inclúe propostas por máis de 27,6 millóns de euros distribuídas entre As Pontes (13,5 millóns centrados en reindustrialización), Cabanas, Monfero (2 millóns para a recuperación do Mosteiro) e A Capela.

"O BNG ten un proxecto claro para o rural galego e para a comarca do Eume. Non son propostas dispersas, senón un plan integrado de desenvolvemento territorial que prioriza a calidade de vida, a protección ambiental, a cultura e as infraestruturas. Agora depende da Xunta de Galiza aceptar estas propostas e convertelas en realidade", finalizou Xosé Golpe.

O BNG mantén o compromiso de traballar no Parlamento de Galiza para que estas emendas sexan aceptadas e financiadas nos orzamentos finais de 2026. "O traballo hoxe é só o comenzo. Agora toca traballar no Parlamento, na rúa e con toda a xente de Pontedeume para que estes proxectos se convertan en investimento real", sinalou Aaron Curbeira.