O pasado 13 de marzo a Consellería de Medio Ambiente e Cambio Climático ordenou a suspensión dunha parte da actividade do Centro de Tratamento de Residuos Industriais de Galicia (CTRIG), localizado no concello das Somozas, como medida cautelar e preventiva ante a detección de varios casos de intoxicación na contorna.

A decisión adoptouse despois de que nas horas anteriores se recibiran a través do 112 varios avisos de centros sanitarios da comarca advertindo da existencia de pacientes que referían diferente sintomatoloxía de carácter leve, como dores de cabeza e molestias oculares, entre outras.

O certo é que desde o incendio producido nas instalacións de SOGARISA o 29 de outubro do 2023, que afectou ao control da estación de evaporización e oxidación (EVOX), os veciños da zona do Pereiro veñen queixándose da aparición dunhas néboas baixas e densas, con mal cheiro, que non parecen ser de vapor de auga e que non se dilúen senón despois de superado un radio de 3 ou 4 quilómetros.

Debemos lembrar que a estación EVOX é un sistema de tratamento de residuos líquidos non inflamábeis e que o incendio de outubro do 2023 pode estar relacionado co tratamento de algún tipo de residuos non autorizado.

Feitos coma este e outros relacionados con estas e outras instalacións industriais no polígono das Somozas fan dubidar da eficacia das actuacións da Consellería de Medio Ambiente, xa que moitas son coñecidas previamente polas empresas, e outras, as que se producen despois de accidentes, demoran o suficiente para ocultar ou matizar as causas reais dos mesmos.

Desde o BNG vimos chamando a atención da Xunta de Galiza sobre estes feitos recorrentes, e demandando unha maior implicación e dilixencia das autoridades competentes para controlar a actividade industrial deste polígono tan especializado, xa que estamos a falar dun polígono industrial que concentra moitas empresas dedicadas ao tratamento de residuos perigosos en cantidades e volumes moi elevados, polo que o efecto acumulado das diferentes emisións, tanto de augas como de fumes e outros, deben ser debidamente identificados e ponderados.

Por outra banda, os anuncios de novos proxectos industriais para este polígono están relacionados de novo coa actividade do tratamento de residuos ou con procesos químicos, o que vai aumentar as dificultades para realizar un control eficaz.

É por isto que o Grupo parlamentar do BNG ven de presentar unha batería de iniciativas sobre este asunto, desde unha Proposición non de lei para instando á Xunta a realizar unha auditoría medio ambiental e de Seguridade industrial en todas as empresas do polígono das Somozas, nomeadamente dos sistemas de depuración das augas residuais, dos fumes e outras emisións atmosféricas, así como a instalar captadores en diferentes puntos da contorna do polígono, unha relación de preguntas sobre as posíbeis causas destas intoxicacións.