O BNG demandará no Parlamento Galego que a Xunta exerza as súas competencias como autoridade laboral no conflito de LIDL

 

Logo do encontro co persoal, o deputado do BNG lembrou que "a folga está convocada por causa dos reiterados incumprimentos do convenio colectivo por parte da empresa e a súa negativa a atender as reclamacións do cadro de persoal. O principal incumprimento é a realización de xornadas extraordinarias excesivas, por riba dos límites legais, que xa ten sido obxecto de denuncias perante Inspección de traballo, sen que a dirección da empresa faga nada por rectificar o seu comportamento, nin sequera sentar na mesa de negociación"

 

Neste centro de traballo prestan servizo unhas 150 persoas, e a folga está a ter un elevado seguimento, que entre o persoal indefinido é do 100%.

 

Mon Fernández denunciou que "a dirección da empresa está a tomar medidas para fornecer de mercadoría as tendas desde outros almacéns, o que é unha conduta manifestamente vulneradora do direito fundamental de folga do persoal. A CIG, como sindicato convocante da folga, ven de presentar demanda perante a xurisdición social por este motivo" engadindo que "no entanto a empresa mantén a súa negativa a negociar co comité de folga unha posíbel solución negociada do conflito"

 

Por estas razóns o deputado Mon Fernández ven de presentar a seguinte Proposición non de lei para o seu debate no Parlamento Galego:

 

“O Parlamento de Galiza insta á Xunta:

 

1. A exercer as súas competencias como autoridade laboral protexendo o direito fundamental do persoal en folga e sancionando os incumprimentos do convenio colectivo de aplicación

 

2. Promover unha saída negociada ao conflito a través do Consello Galego de Relacións Laborais”